Fréttir

Byggðasafn Skagfirðinga, Héraðsbókasafn Skagfirðinga, Héraðsskjalasafn Skagfirðinga og Listasafn Skagfirðinga tóku sig saman og létu hanna fyrir sig nýtt auðkenni safnanna. Nýtt og sameiginlegt auðkenni er tákn um vilja safnanna til aukins samstarfs sín á milli, sem öll sinna skagfirskum menningararfi.

Við vekjum athygli á breyttum opnunartíma sem tekur gildi á morgun, 1. september. Please note that from September 1st the opening hours of the museum will change.

Safnið verður áfram opið eins og vanalega en við fellum niður daglegar leiðsagnir og leiki á laugardögum næstu tvær vikurnar hið minnsta. Gestir eru minntir á að virða 2 metra regluna og allir sameiginlegir snertifletir verða sótthreinsaðir reglulega. Við hvetjum safngesti okkar, sem og landsmenn alla, að hafa það hugfast að við erum öll almannavarnir.

Frábært var að fá Nathalie Jacqueminet, sérfræðing í forvörslu og safnafræðing, til ráðgjafar í Byggðasafninu í tæpar tvær vikur núna í júlí.

Í dag er Alþjóðlegi safnadagurinn og vegna Covid19 er honum fagnað á söfnum með stafrænum lausnum um heim allan. Að þessu sinni vilja söfnin vekja athygli á jafnrétti og fagna fjölbreytileikanum með yfirskriftinni „Söfn eru jöfn: Fjölbreytni og þátttaka allra“ (e. Museums for Equality: Diversity and Inclusion) en höfuðatriði samfélagslegs gildis safna er möguleikinn á því að bjóða fólki af ólíkum uppruna og með ólíkan bakgrunn að upplifa einstaka hluti. Það er gert til dæmis með því að vekja máls á ýmsum ójöfnuði, getur tekið til margra atriða; til dæmis þjóðernis, kyns, kynhneigðar og kynvitundar, félagslegs bakgrunns, menntunarstigs, líkamlegrar getu, stjórnmálaskoðana og trúarbragða.

Byggðasafn Skagfirðinga, Byggðasafn Húnvetninga og Strandamanna og Heimilisiðnaðarsafnið á Blönduósi hafa undanfarin tvö ár verið að efla faglegt samstarf safnanna. Nú standa söfnin fyrir sameiginlegri vefsýningu á menningarsögulega gagnasafninu Sarpur.is. Sýningin ber heitið Illeppar sem hlýjuðu fótum fyrr á öldum og inniheldur nokkur sýnishorn af fallegum og skrautlegum illeppum sem varðveittir eru hjá söfnunum þremur.

Opnað hefur verið fyrir vefsýninguna "Um viðgerðir og endurnotkun" á Sarpi. Hjá Byggðasafni Skagfirðinga eru varðveittir gripir sem sýna viðleitni fólks til að gjörnýta eigur sínar. Vefsýningin inniheldur gripi sem hafa verið viðgerðir eða fengið annað hlutverk en þeim var upphaflega ætlað. Ýmislegt má læra af neysluhegðun og hugviti forfeðra og formæðra okkar og við vonum að þessi litla sýning verði ykkur til ánægju og innblásturs.

Brenda Prehal hefur verið ráðin sem deildarstjóri fornleifadeildar Byggðasafns Skagfirðinga. Brenda er doktorsnemi við CUNY, The City University of New York, og er rannsóknarefni hennar heiðnir greftrunarsiðir á Íslandi. Brenda hefur reynslu af fornleifarannsóknum víðs vegar um landið frá árinu 2010, m.a. á Vestfjörðum, Mývatni og í Reykjavík, hún hefur einnig stundað fornleifarannsóknir í Noregi og á Skotlandi, auk þess sem hún hefur starfað við kennslu í fornleifafræði við CUNY háskólann í New York.

Byggðasafn Skagfirðinga hlýtur styrki úr Húsafriðunarsjóði og Fornminjasjóði fyrir árið 2020. Húsafriðunarsjóður úthlutaði Byggðasafninu alls 3,2 milljónir króna og Fornminjasjóður 2,1 milljónir króna.

Byggðasafn Skagfirðinga hlýtur alls 4,1 milljón króna úr safnasjóði fyrir árið 2020. Tilkynnt var um úthlutunina í dag að Mennta- og menningarmálaráðherra hafi úthlutað alls 177.243.000 kr. úr safnasjóði, að fenginni umsögn safnaráðs. Tilgangur sjóðsins er að efla starfsemi safna í landinu.