Fréttir

Í síðustu viku grófu Rarik-menn skurð austan við gamla bæjarhólinn í Keflavík í Hegranesi. Í skurðinum sá Þórey bóndi í Keflavík hleðslusteina sem hún lét vita af. Þegar þeir voru kannaðir í morgun komu í ljós gamlar hleðslur undir ljósu öskulagi frá Heklugosi 1104. Sömuleiðis fundust fótabein tveggja einstaklinga sem hafa verið lagðir þar til greftrunar.

Dagana 18-20. október er fyrirhugað að halda námskeið í kljásteinavefnað í Auðunarstofu, á Hólum í Hjaltadal. Upplýsingar gefur Bryndís Zoëga, bryndisz@skagafjordur.is eða í síma 453 5097.

Í dag fékk fyrsti hópur nemenda í húsasmíðum í FNV að kynnast hvernig best er að haga timburviðgerðum á gömlum húsum. Framhúsið á Tyrfingsstöðum er kjörinn vettvangur fyrir slíka kennslu. Kennari þeirra er Björn Björnsson, trésmíðameistari. Byggðasafnið, Fornverkaskólinn ogTyrfingsstaðabændur útvega farartæki, fæði, efni og aðstöðu.

Fornleifadeild Byggðasafns Skagfirðinga, ásamt samstarfsaðilum, hlaut nýverið Evrópustyrk til greininga á íslenskum deiglum. Deiglur eru ílát til að bræða málma, einkum eir eða kopar og ýmsar samsetningar af kopar, tini og blýi og hafa verið notaðar á Íslandi frá landnámi til okkar daga. Í elstu tíð hafa þær verið smáar, á stærð við kaffibolla og jafnvel smærri, og gerðar úr leir, en á seinni öldum einnig úr málmum og steinefnum af ýmsu tagi.

Nú er lokið uppgreftri 11. aldar kirkjugarðsins að Stóru-Seylu, Langholti. Frumniðurstöður rannsóknarinnar benda til að garðurinn hafi verið fremur stutt í notkun þar sem í honum fundust einungis 23 grafir. Þar af voru áætlaðar grafir 13 fullorðinna einstaklinga, tvær grafir stálpaðra barna, gröf unglings auk 7 ungbarnagrafa. Ekki er hægt að fullyrða um aldur og kyn allra sem í gröfunum lágu þar sem að 13 þeirra höfðu verið tæmdar að fullu eða að mestu. Þó var hægt að áætla aldurinn gróflega út frá þeim beinaleifum sem enn voru til staðar í graffyllingum sem og stærð grafanna.

Nú fer fram, annað sumarið í röð, fornleifauppgröftur á 11. aldar kirkjugarði á Stóru-Seylu á Langholti, Skagafirði. Rannsóknin mun taka þrjár vikur og að henni koma 10 manns, sérfræðingar og nemar bæði innlendir og erlendir. Verkefnið er á vegum Fornleifadeildar Byggðasafnsins í samstarfi við bandarískan rannsóknarhóp sem hefur undanfarin 10 ár stundað fornleifa- og jarðsjárrannsóknir í héraðinu.

Í fyrra var smíðaður vefstóll, oftast kallaður vefstaður, fyrir byggðasafnið. Fyrirmyndin að vefstólnum er í safninu á Austurey í Noregi, þaðan sem smiður var sendur til að aðstoða okkur við smíðina. Stólnum var komið fyrir í Auðnarstofu á Hólum. Í framhaldinu var haldið námskeið í vefnaði og þótti tilvalið að vefa fyrst röggvarfeld.

Þegar rífa átti vestur­gafl syðri skemmunnar í Glaumbæ kom í ljós að gaflhlaðið var tvíhlaðið. Innan við klömburhleðslu frá miðri 20. öld var strenghlaðinn gafl þess húss sem stóð á undan skemmunni en það var hesthús séra Hallgríms Thorlaciusar, sem bjó í Glaumbæ frá 1894 til 1935. Á miðjum gaflinum eru tóftardyrnar, samfallnar. Þessar tóftardyr og elsti hluti gaflsins sjást vel innan úr skemmunni. Ljúka átti viðgerðum sem hófust á skemmunni í maí með því að hlaða upp vesturgafl hússins og gilda upp í norðurvegginn.