Velkomin á aðventuviðburð Byggðasafns Skagfirðinga, við ætlum að njóta samveru á Rökkurgöngu í Glaumbæ sunnudaginn, 30. nóvember.
Félagar úr Kvæðamannafélaginu Gefjunni og þjóðháttafélaginu Handraðanum taka þátt í að skapa jólastemningu í bænum. Farið verður með kveðskap og hægt verður að sjá kertagerð, laufabrauðsgerð og tálgun og hver veit nema einhverjir jólasveinar kíki í bæinn.
Kaffistofan í Áshúsi verður opin og hægt verður að versla kræsingar frá Elínborgu í Breiðargerði, Amber hjá Ísponica og Völu í Korg. Það verður því sannur hátíðarbragur yfir svæðinu!
Ókeypis verður á safnið á meðan á viðburðinum stendur kl. 15-17. Við hvetjum fólk til þess að mæta með góða skapið og vasaljós, hlökkum til að sjá ykkur!